NAVIGU...Navigu ppi' capiri cos'è 'u mari
ca all'occhi nostri havi gran putiri
cu' li s0' unni iddu fa scantari
cu' ci duna 'sta forza lu Signuri?
Suli e luna luntanu ci 'ana stari
picchì tuttu è capaci d'agghiuttiri
l'omu vulissi sempri navigari
e 'sta putenza ranni 'n sa risistiri.
Ulissi nui vulemu imitari
ppi mari, munnu e celu mantiniri
na vita curaggiusa e suppurtari
tutti li provi ca Diu ni cuncedi.
Navigu sulitariu senza cumpagni
navigu ni 'sta putenza tanta ranni
mi pigghia ri la testa a li calcagni
e viru rialtà troppu prufunni.
Cosa diversa iri pi li campagni
viriri 'n fruttu ca' ri 'n albiru penni
nun c'è pianura e mancu muntagni
ca lu mari sustituisci a li sò funni.
Lu mari a mia mi sta attornu
e mi trasporta n'avanti e n'arreri
ju lu sentu la notti e lu jornu
mi duna sempri cunsigghi e pariri.
Angelo Rullini
