MI MANCA...Mi manca la sublimi tinnirizza
di li 'mmizzigghi toi, lu to' parrari
cu vuci di villutu, la ducizza
di li to' labbra na lu so' vasari,
mi manca la to' limpida frischizza,
lu to' surrisu ca sapia 'ncantari,
mi manca la to' morbida carizza
ca l'infinitu mi facia tuccari;
mi mancanu 'dd'ucchiuzzi ammaliaturi,
luci di vita ca nun vidu chiù,
'dda nascaredda allegra, lu caluri
ca tu mi dasti na 'n tempu ca fu;
mi mancanu li to' capiddi scuri;
mi manca... amuri miu, mi manchi tu!
Antonino Magrì
Nessun commento:
Posta un commento