VERSI POPOLARI

LU 'NGUI', LU 'NGUI', LU 'NGUA
L'omu ca si sta libiru
sempri scialannu sta,
allegru e cuntintissimu
'nta la filicità.
Ma poi si ppi disgrazia
si accasa ed è papà,
o quanti è bruttu sentiri
ddu 'nguì, ddu 'nguì, ddu 'nguà.
Li donni su la causa
ppi fari 'ncatinari
ad un poviru giuvani
ca schettu nun sa stari.
Arrassu ddi dda giuvina
ca schittulidda sta,
si ci 'ncugnati, giuvini,
la guerra vinirà.
Poi veni la giustizia
spusari vi la fà,
e quantu è bruttu a sentiri
lu 'nguì, lu 'nguì, lu 'nguà.