'MMUNNIZZAQuannu ri nicu a' scola jia,
m'anzignaru 'stà longa litania:
"Cririri, obbediri, cummattiri,"
fòrmanu de' nichi lu caratteri.
Haju crirutu a Potestà e Sinnaci
puru si lu me' cori nun si rava paci.
Eranu d'assupra ppi lu sò piaciri
o numinati ppi lu populu sirviri?
Pigghiamu la custioni d'ammunnizza:
prima ci foru spazzini ca' ramazza
poi canciaru nomu...e foru vai!
tu mi l'ha purtari o' cassunettu
'ntrusciata no' giustu so' sacchettu.
Era nu cassunettu di virdi culuratu,
a' strasatta, nu jornu, tri n'haju truvatu.
Eranu tri pittati di vari culuri
ca mittianu alligria ni lu cori.
Comu di nicu m'avianu 'nzignatu
'a munnizza l'haju differenziatu.
Veru ca sunu luntani dà mà casa
e lu sacchettu a li voti pisa
ma dissiru ca cu la "differenziata"
'a tassa m'avissunu scalata!
Ca quannu mai! 'A bulletta arrivò a tutti quanti
di annu in annu sempri cchiù pisanti.
'A curpa era do' populu incivili
ca l'ammunnizza nun sapia spartiri.
Fu ciuciuliatu... ca era n'autra cosa
ca chissa cuntata era na' scusa.
'A munnizza 'na vota ricugghiuta
tutta assieme vinia macinata.
Ora 'n cunsigghiu, ccà granni umiltati
vulissi dari ppi lu beni da' citati:
Veru 'ca semu nù pocu ineducati
e li cumanni su' pocu ascutati
ma vulissi fari nu raggiunamentu:
Se l'autri città, a centu a centu
hanu risoltu dà munnizza lu problema
li putissimu imitari quantu prima?
Ni 'sti città 'a munnizza è prilivata
casa ppi casa e no menzu à strata.
Lu populu jè veru, ha fari 'u so' duviri
ma cussì ha fari puru cu cumanna.
Lu me' pinzeru - speru nun s'inganna -
rici: Imitamu di curca st'amministrazioni
e dell'immunizza sistimamu la custioni.
Giorgio Guarnaccia
Nessun commento:
Posta un commento