JE' NATA 'NA STIDDA di Lucia Campisi

la poetessa Lucia Campisi

JE' NATA 'NA STIDDA

Ringraziu Diu,

ccu tuttu 'u me' cori,

picchì vivu jorna filici

propriu comu chiddi

ca "Iddu" runa e' Santi,

accussì sulu,

pozzu riri,

ri aviri gudutu

'i gioii cchiù priziusi

'ra vita.

I lacrimi,

linianu

'a faccia mia

ma sunu lacrimi

ri preju,

ri cuntintizza.

A casa mia,

pari nu jardinu 'ncantatu,

chinu di ciuri janchi e rosa

rintrona ri musica,

ri canti e risati,

picch' m'à nasciutu

'na "stidda".

Jè 'na niputedda,

bedda quantu 'u suli

'na cosa rara e spiciali,

'nu beni priziusu,

mannatu do' Signuri.

Jè 'n angilu,

biunnu e ricciutu,

'nu faguttinu rosa,

'nta so' naca,

fatta di veli e pizzi priziusi.

Mi talia sempri,

quannu m'avvicinu

ccu l'ucchiuzzi so' lucenti

pari ca mi rici:

nanna, nanna mia,

pigghimi ccu tia,

stringimi 'nte to' vrazza

fotti, fotti,

cantami

'a ninna nanna,

cca to' vuci,

aruci, aruci

fammi addummisciri

supra 'u to' pettu amurusu.

Lucia Campisi