LI ME' SUNETTIJu li cugghivi 'mmenzu li lurdumi,
'nta li taverni, 'ntra lu lupanaru.
unni lu nostru suli è tantu avaru
di luci, né virtù, né c'é custumi.
Ju li cugghivi unni paru paru
lu sangu allimarratu scurri a sciumi,
unni lu scuri è fittu e c'è pri lumi
sulu ocche luci luci picuraru.
E li cugghii di notti, sgammitati,
tastiannu comu l'orvi muru muru
e zuppicannu comu li sciancati.
Pricchissu, ed anchi pricchì su' sicuru
chi a fari lustru non su' distinati,
ju li vosi chiamari: " 'o scuru, 'o scuru"
Nino Martoglio (dalla Centona)
Nessun commento:
Posta un commento