POETI ANTEAS SIRACUSA - Giorgio Guarnaccia

' NOVA BABELE

Ni lu granni "pumu russu"

comu chiamanu Novi Yorchi,

fabbricaru ddu palazzi

ca tuccavunu lu celu.

Tuuti rui misi a tagghiu,

tutti rui, stissa rannizza,

tantu è veru ca la genti

li chiamavanu "li gemelli".

Tuttu 'u populu vantava

la biddizza e la pussanza

ri si ranni costruzioni,

vantu puru di la nazioni.

Era l'unnici sittembri

l'annu appressu a quannu 'a genti

lu millenniu fistiggiava

augurannusi la paci.

Ni lu celu chiaru e tersu

tuttu 'u populu taliò

nu veivulu ca 'na torri

rittu rittu la puntò.

Fu gran bottu e granni focu

tutta 'a genti a vucca aperta

sò ca visti nun criria...

la pigghiau a majaria.

Ma passaru pocu tempu

tutti vittiru 'n aereu

ca facennu comu 'u primu

contru l'autra s'aschiantò.

St'autru bottu 'u finimunnu

ppi li strati scatinò.

Cu currìa senza mutivu

cu currìa ppi dari aiutu.

Ma lu dannu ranni assai

nunn'avia a finiri ddocu:

Prima l'una e lautra appressu

li si vitti accartuciari.

Parsi vinni 'n terremotu

puru 'a terra sussurtò

e 'n infernu 'i fumu e focu

tutta 'a zona addivintò.

Nei palazzi a ssu mumentu

c'era genti a lu travagghiu,

c'era genti a centu a centu

chi la morti s'arrubbò.

Parsi'a storia 'i Babilonia

quannu l'omu supraniusu

ccu na ranni costruzioni

a Diu stissu pruvucò.

Fu la manu 'i terruristi

ca li ranni costruzioni

cu gran dannu a li pirsuni

chista vota distruggeru.

Fu pirmissu do Signuri

'nu disastru tantu ranni

ppi puniri 'a tracutanza

di s'arruganti sucietà?

Giorgio Guarnaccia