L'ECU DI LI VASUNI di Giuseppe Nicolosi Scandurra

L'ECU DI LI VASUNI

Crisceva ccu la frunna e l'anniddatu
virdi, pumpusa, carrica la vigna,
quannu lu ventu 'nfurzava lu ciatu
jucaunu li cimi a la pazzigna.

Iu ccu Rusidda, comu l'arti 'nsigna,
facevumu li viti ad archiggiatu,
misi a filagnu, tutti dui d'allatu,
so patri arrassu scippava gramigna.

Senza ca mai so patri mi videva,
iu a mmenzu di li pampini, ammucciuni
vasava Rosa, ed idda mi rideva.

So patri spinci all'aria lu zappuni,
vinni, darimi corpa mi vuleva
ca 'ntisi l'ecu di li mei vasuni

Giuseppe Nicolosi Scandurra

(da NATURA E SINTIMENTU Tip. F.Conti 1951)