MACCHIA DI MURTIDDHA
O macchia di murtiddha, sì' spiciusa!
sì tantu beddha ddhocu unni sì misa;
la pampineddha to' è ummirusa,
di virdi scuru è la to' cammisa.
Li frutti toi su' boni 'i manciari
e a tutti li pueti fai cantari.
Lu ciuri èni jiancu e prufumatu;
quannu ti visti mi ni 'nnamurai,
pi taliariti megghiu m'haiu firmatu,
ca vegnu di luntanu, e tu lu sai...
Ti chiantau la massara o' cantu a' via
e d''a finestra sempri ti talia.
Si la lapuzza si ferma a manciari,
si ni va sulu quannu si sazìa;
iddha pi sempri si vulissi stari,
pirchì troppu, a manciari, s'arricrìa.
Iu ti taliu e arrestu incantatu,
pirchì di tia sugnu 'nnammuratu!
Settimo Martorano - Sortino -
anteaspoesie@yahoo.it
Nessun commento:
Posta un commento