BAGGHIU DI TUNNARA - Carmelo Molino

BAGGHIU DI TUNNARA
Porti 'nchiusi a lu bagghiu;
àncuri, varchi a siccu
e silenzii.
Sulu lu ventu 'mbrijacu di mustu
cravacca lu cannitu
e cutulia lu frassinu
ca chianci manna.
Sulu lu ventu ca svigghia lu suli,
(No vecchiu nun mi diri
di tunni e di mattanzi
pirchì lu munnu è tuttu na tunnara).
Su sti timpi e sti ciauli
e sti celi 'nnuccenti
e sti scami di mari
su na minzogna,
lassa ca cridu anticchia
la paci di stu bàgghiu.
carmelo molino

CORTILE DI TONNARA - Porte chiuse al cortile/ ancore, barche in secco/ e silenzi./ Solo il vento ubriaco di mosto/ cavalca il canneto/ e scuote il frassino/ che piange manna./ Solo il vento che sveglia il sole/ (No vecchio non mi dire/ di tonni e di mattanze/ perchè il mondo è tutto una tonnara)/ Son questi poggi e queste gazze/ e questi cieli innoccenti/ e queste squame di mare/ sono menzogna/ lascia che creda un poco/ alla pace di questo cortile.